D’Moutarderie de Luxembourg produzéiert all Joer, virun allem fir den nationale Marché, ëm déi 240 Tonne Moschter a 160 Tonne Mayonnaise. D’Moschterkäre kommen aus Kanada an aus Europa, den Esseg deen mir an eisen Saucen an eisem Moschter benotzen ass aus Letzebuerg.

All d’Ingrediente si garantéiert 100 % natierlech an ouni Konservéierungsstoffer. De lëtzebuergesche Moschter huet am Verglach mat anerem Moschter e vill méi kuerzen Haltbarkeetsdatum. Genee dat mengt de Roland MUNHOWEN, wann hien en als e Produit bezeechent, deen „authentesch ass, eng laang Traditioun huet a jonk, frësch a sämeg genoss soll ginn“.

Bei all de Produktiounsetappen, déi Dag fir Dag a just op Basis vu fixe Liwweropträg duerchgefouert ginn, sinn de Roland a Yann MUNHOWEN ëmmer derbäi – vum Choix an der Commande vun de Matière-premièren, dem Iwwerpréiwe vun de Basisrezepter bis bei d’Supervisioun vun de leschten Aarbechtsschrëtter.

Am Géigesaz zu anere Moschterproduzenten huele mir beim Muelen d’ätheresch Ueleger aus de Kären net eraus. Esou kritt de Moschter eng nach besser Qualitéit an en eenzegaartegen Aroma.